स्वस्थ नारी सशक्त परिवार अभियानातील ठाणे महापालिकेच्या आरोग्य शिबिरांचे उद्घाटन

Maharashtra Majha News September 18, 2025

खासदार नरेश म्हस्के, जिल्हाधिकारी डॉ. श्रीकृष्ण पांचाळ यांची उपस्थिती
१७ सप्टेंबर ते ०२ ऑक्टोबरपर्यंत महापालिकेच्या सर्व आरोग्य केंद्रात तपासणी शिबिरांचे आयोजन

ठाणे : आरोग्य व कुटुंब कल्याण मंत्रालयातर्फे राबविण्यात येत असलेल्या ‘स्वस्थ नारी सशक्त परिवार’ या अभियानाअंर्तगत ठाणे महापालिकेतर्फे आयोजित महिला व बालकांसाठी विविध आरोग्य तपासणी शिबिरांचे उद्घाटन बुधवारी खासदार नरेश म्हस्के आणि जिल्हाधिकारी डॉ. श्रीकृष्ण पांचाळ यांनी केले. १७ सप्टेंबरपासून सुरू झालेले हे अभियान ०२ ऑक्टोबरपर्यंत सुरू राहणार आहे. वर्तकनगर येथील लोकमान्य टिळक नर्सिंग होम, कोरस रुग्णालय येथून ठाणे महापालिका क्षेत्रातील या अभियानाची सुरूवात करण्यात आली. ‘स्वस्थ नारी सशक्त परिवार’ या देशस्तरावरील अभियानाचे मध्य प्रदेशमधील धार येथे पंतप्रधान नरेंद्र मोदी यांच्या हस्ते उद्घाटन करण्यात आले. त्या समारंभाचे थेट प्रक्षेपणही लोकमान्य टिळक नर्सिंग होम येथे करण्यात आले. त्यावेळी, खासदार नरेश म्हस्के, जिल्हाधिकारी डॉ. श्रीकृष्ण पांचाळ, अतिरिक्त आयुक्त संदीप माळवी, उपायुक्त (आरोग्य) उमेश बिरारी, माजी नगरसेविका आशा डोंगरे, मुख्य वैद्यकीय आरोग्य अधिकारी डॉ. प्रसाद पाटील, माता व बाल संगोपन अधिकारी डॉ. वर्षा ससाणे आदी उपस्थित होते.

याप्रसंगी, खासदार नरेश म्हस्के यांच्या हस्ते नवीन एक्स रे मशीनचे लोकार्पण करण्यात आले. तसेच, २५ क्षयरुग्णांच्या नातेवाईकांना नि:क्षय मित्र योजनेअंर्तगत पोषण आहार देण्यात आला.
स्त्रियांचे आरोग्य आणि सबलीकरण हे आपल्या कुटुंबांचे, समाजाचे आणि अखेरीस संपूर्ण राष्ट्राच्या प्रगतीचा केंद्रबिंदू असतो. त्या अनुषंगाने आरोग्य व कुटुंब कल्याण मंत्रालयातर्फे ‘स्वस्थ नारी सशक्त परिवार’ या अभियानाची आखणी करण्यात आली आहे. ठाणे महापालिकेच्या सर्व नागरी प्राथमिक आरोग्य केंद्रामध्ये ‘स्वस्थ नारी सशक्त परिवार’ हे अभियान राबविण्यात येणार आहे. त्या अंतर्गत होणाऱ्या आरोग्य शिबिरांमध्ये महिलांसाठी वेगवेगळ्या आरोग्य सेवा उपलब्ध करून देण्यात येतील. ०२ ऑक्टोबरपर्यंत चालणाऱ्या या अभियानात ९२ विशेष शिबिरे, दंत चिकित्सेची

१४ शिबिरे, मॅमोग्राफीची १४ शिबिरे अशाप्रकारे एकूण ४१६ विविध आरोग्य शिबिरांचे आयोजन करण्यात येणार असल्याची माहिती मुख्य वैद्यकीय अधिकारी डॉ. प्रसाद पाटील यांनी दिली.

याची होणार तपासणी, होणार समुपदेशन

उच्च रक्तदाब, मधुमेह, कर्करोग, ह्दयरोग आदी असंसर्गजन्य रोगांचे तपासणी शिबीर, नेत्र तपासणी, दंत तपासणी, माता व बाल आरोग्य शिबीर, महिला व बालकांसाठी पोषण जागरुकता सत्रे, आयुष आणि योग शिबिरे, क्षयरोग जागरुकता आणि तपासणी शिबिरे, रक्तदान शिबीर, अवयवदान प्रतिज्ञा, मोफत औषध वितरण, मानसिक आरोग्य समुपदेशन, व्यसनमुक्ती शिबीर, किशोरवयीन मुली आणि महिलांसाठी रक्तक्षय तपासणी आणि समुपदेशन, क्षयरोग तपासणी, सिकलसेल रोग तपासणी यांचे आयोजन सर्व नागरी केंद्र येथे करण्यात येणार आहे.

महिला व बालक यांना लाभ घेण्याचे आवाहन

स्वस्थ नारी सशक्त परिवार अभियानात होणाऱ्या आरोग्य शिबिराचा लाभ शहरातील सर्व महिला तसेच गरोदर माता व सर्व लहान बालकांन होणार असून त्याचा जास्तीत जास्त लाभ करून घ्यावा, असे आवाहन ठाणे महापालिकेच्या सार्वजनिक आरोग्य विभागामार्फत करण्यात आले आहे.